A fraga do meu avó

MAMÁ CABRA, S. BORRÁS e G. SÁNCHEZ (2019). A fraga do meu avó. Ilust. María Lires. Vigo: Editorial Galaxia, col Sonárbore, 26 pp. (ISBN: 978-84-9151-359-9).

Descrición do formato e o contido: álbum ilustrado do grupo musical Mamá Cabra, con letras de Alicia Borrás e Gloria Sánchez. Presenta unha cuberta dura e resistente, follas de papel reciclado, o que relaciona o formato e o contido do álbum. A súa forma é rectangular cunhas dimensións de 24x21 cm. Na súa cuberta podemos ver unha ilustración cunha paisaxe verde entre a que se esconde un raposo; na parte superior aparece o título en grande e de cor branco xunto co nome das autoras, na inferior en cor amarelo aparece a editorial. Ademais, na esquina dereita superior amósase un cd, o cal aparece nunha funda na última garda do libro. Por outra parte, nas gardas aparecen diversos debuxos de follas con diferentes tonalidades verdes e marróns, as cales nos transmiten que as árbores serán as protagonistas da obra. Na primeira folla aparecen os datos correspondente á ficha bibliográfica, xunto con agradecementos; a seguinte corresponde coa portada, na que aparece o título da obra en cor marrón cun tamaño grande e en maiúsculas, acompañado por unha pequena ilustración dunha folla verde cun insecto enriba. Finalmente, na contracuberta, sobre o fondo verde dunha paisaxe, descríbese o propósito e o contido do mesmo: música e poesía apegada á problemática da natureza.

Ao longo das páxinas amósanse fermosas ilustracións cheas de cor, entre os elementos do libro destacan as árbores, as follas, animais… Para a realización das mesmas empregouse unha técnica mixta mediante diversas texturas realizadas a man con pintura acrílica e diversas técnicas experimentais. En todas as ilustracións predominan as cores verdes e marróns propias do mundo natural.

En cada par de páxinas aparece unha canción escrita en verso, baixo o título da mesma en letra maiúscula. A tipografía empregada é sinxela e de cor negra, adoita aparecer sobre fondo branco, agás nalgunhas páxinas sobre fondo verde ou marrón. Cada canción ocupa a páxina enteira e na contigua amósase unha ilustración relacionada co contido.

Dende o punto de vista do contido pódese dividir en dúas partes: un primeiro poema no que, póndolle voz ao bosque, se lle transmite aos nenos/as a necesidade do seu coidado para poder seguir gozando del coma ata agora. A outra parte corresponde cun conxunto de letras de cancións, das que podemos gozar co Cd que contén no final. Estas cancións intentan transmitir diversas mensaxes para o coidado da natureza como: aproveitar os papeis por ámbalas caras, intentar diminuír o uso dos transportes, non tirar lixo. Ademais preséntanos a problemática dos bosques autóctonos e dos espazos naturais e todo o que eles nos proporcionan; todo isto cheo de música, poesía e alegría.

Potencialidades: A fraga do meu avó ten como principal obxectivo acercar os máis pequenos/as á problemática actual dos bosques autóctonos e conciencialos da importancia destes. Esta lectura axúdanos a mostrarlle aos nenos e nenas todo o que non proporciona o medio natural e a diversión e felicidade que nos facilita. Ademais incide nas prácticas que debemos de cambiar para mellorar a problemática actual. Este álbum ilustrado permite achegar aos máis pequenos ao mundo da natureza, propiciando tamén novos coñecementos e aprendizaxes relacionadas co medio ambiente. Todo isto faino coa axuda da poesía, da música que tanto apaixona aos pequenos/as e de fermosas e rechamantes ilustracións.

  Recursos:

Mamá Cabra (2019) A fraga do meu avó [Arquivo de vídeo] Recuperado de https://www.youtube.com/watch?v=F08Rpn55wVU