Ana está furiosa

Nöstlinger, Christine (1992). Ana está furiosa, ilust. Arnal Ballester, trad. Carmen Bas, Madrid: SM, col. El Barco de Vapor, 59 pp. (ISBN: 978-84-348-3773-7).

Breve descrición do formato e contido da obra:

libro rectangular de tapa branda e encadernación rústica coas follas dun tacto similar á cartolina. Na cuberta aparece a protagonista do conto, Ana, furiosa e vermella, acompañada polo seu gato. Na contracuberta aparece un breve resumo do contido do libro.  É un libro narrativo en castelán que conta, en cada unha das súas páxinas, con texto e pequenas ilustracións representativas deste. 

Ana é unha nena que se enfada por todo, sempre está furiosa: berra continuamente, incluso chega a mancarse a si mesma en diversas ocasións. Os nenos e nenas métense con ela para que se enfade. Un día, na casa, póñenlle fin a esta situación, e é seu avó que, coa axuda dun tambor, lle ensina como canalizar toda esa ira.

Potencialidades: é unha divertida historia que ensina a afrontar os problemas, é dicir, como hai opcións para manexar todos os sentimentos que non son bos para nós mesmos e a xente que nos rodea. Neste caso, trata os cabreos dunha nena e como o seu avó, que nunca lle mente e sempre lle axuda (ideal de avó ou avoa de todo neno e nena pequena), lle ofrece unha solución.

Paula y su cabello multicolor

Parets Luque, Carmen (2014), Paula y su cabello multicolor, Madrid: Createspace (2-6 años), [24 pp.] (ISBN: 978-14-9936-533-7).

Breve descrición do formato e contido: álbum ilustrado que se caracteriza por ser de formato mediano e rectangular, con cantos rematados en punta e as tapas de cartón brando. Na cuberta aparece a personaxe principal e sobre ela un rótulo branco co título do libro e o nome da escritora. As cores empregadas son moi vistosas e localízanse unicamente no pelo de Paula, focalizando así a atención no elemento principal da obra. Na contracuberta do libro aparece a mesma imaxe que na cuberta, pero neste caso non está definida e as cores son moi suaves. Nela descríbese o obxectivo do libro e as emocións que aparecen recreadas nel: alegría, tristeza, enfado e medo.

No interior da obra, as páxinas pares teñen unhas ilustracións, caracterizadas por uns toques de cor nos elementos principais que representan unha emoción, sendo o demais de cor branca. Nas páxinas impares aparece o texto en maiúscula, sempre relacionado coa ilustración da seguinte páxina. Emprégase un vocabulario sinxelo, facendo así que sexa fácil comprender a historia. Ao longo do libro van narrándose diferentes situacións cotiás e cómo Paula sente cousas diferentes en cada unha delas, cambiando así a cor do seu pelo.

Potencialidades: con esta obra búscase que os máis pequenos recoñezan as emocións e poidan expresalas dun xeito positivo e saudable. Ademais, ao relacionalas con hábitos da vida cotiá conséguese que os nenos e nenas poidan identificar os sentimentos de alegría, tristeza, medo e enfado dunha forma máis sinxela.