VIOLÍN

Rubio, Antonio (2014), Violín, ilust. Óscar Villán, trad. Manuela Rodríguez, Pontevedra: Kalandraka Editora, [12 pp.] (ISBM: 978-84-8464-855-0).

 

Breve descrición do formato e contido da obra: É un álbum ilustrado de formato cadrado que mide 16 cm. x 16 cm. Está encadernado en cartón duro e os seus cantos son redondeados.

A cuberta e a contracuberta son de cor laranxa. A cuberta preséntanos un neno que está a tocar un violín. Na parte superior da cubeta, en letras brancas, atópase o nome do autor, Antonio Rubio, e o do ilustrador, Óscar Villán. Mentres que na parte inferior, atópase o nome da obra e da editorial, Kalandraka. 

A fundación da editorial Kalandraka, en 1998, abre unha nova etapa na historia da literatura infantil e xuvenil galega, e mesmo de todo o ámbito español. Esta comezou a traducir os seus títulos ao castelán, catalán, éuscaro e mesmo ao inglés. 

Os álbums ilustrados de Kalandraka aproveitan recursos semióticos. Ademais, presentan unha ampla mostra dos ilustradores galegos actuais, gañadores de premios a nivel do Estado ou internacionais. Este camiño aberto por Kalandraka foi seguido por outras editoriais galegas ou do resto do ámbito español: Baía, A Nosa Terra, Everest... Contamos polo tanto, cunha importante produción de álbums ilustrados en galego, autóctonos ou traducidos, de calidade literaria e artística superior, polo xeral, á do período anterior. 

A contracuberta preséntanos o nome da colección, “Do berce á lúa”, xunto co ISBN e o nome da editorial. A colección Do berce a lúa, está dirixida a nenos e nenas de 0 a 3 anos de idade, para quen se deseñou especialmente os pictogramas.

Este pequeno relato permite que o oído dos nenos e das nenas poda recoñecer o mundo da sonoridade, das onomatopeas e sensacións. Instrumentos musicais, palmas e bicos envoltos nas ilustracións.

Potencialidade: Violín é un libro moi práctico para os nenos e nenas polo seu pequeno tamaño, e a vez é moi versátil a pesar da súa aparente simplicidade. 

Esta obra é ideal para traballar os instrumentos musicais dunha maneira lúdica e atractiva. A partir desta obra, podemos fomentar nos nenos e nenas a memorización, a través das frases e dos sons, e posteriormente pódeselle presentar unha maior dificultade, de maneira que as frases e os sons atópense salteados. Así mesmo, os nenos e nenas poderán imitar os xestos que se fan con cada un dos instrumentos e facer ritmos coas distintas onomatopeas que aparecen na obra (pom pom pom, glin glin glin...).  

A partir desta obra podemos traballar algúns factores como poden ser: a memoria, elementos musicais, as cores, os ritmos, a atención, o ritmo, entre outros aspectos. 

Ademais, con este pequeno conto, podemos captar a súa atención a través de cancións, polo que é importante xogar coa voz, as pausas e o ritmo. https://www.youtube.com/watch?v=iM_kCRSh31Y

Lúa

Rubio, Antonio.(2005). Lúa, ilust. Óscar Villan, Pontevedra:Kalandraka, col."Do berce á lúa", (0 a 3 anos), [16 pp.], (ISBN:978-84-8464-541-2).

Breve descrición e formato da obra: Este libro é un poema visual recitable ilustrado por poegramas, cun formato cadrado (16x16 cm), encadernado con tapas duras e grosas feitas de cartón. Na cuberta, aparece o título do conto en letras brancas, e no medio un debuxo dunha lúa que ten boca, nariz,e ollos mergullada nun fondo azul escuro con pintas brancas como se fosen estrelas, mentres que na contracuberta atópanse os datos da obra e unha escala músical, o que nos dá pistas de como é o libro. As ilustracións están feitas con pinceladas de cores fácilmente apreciables, ata o punto de que as texturas poden ser case palpables. A imaxe resalta sobre un fondo branco nun debuxo sinxelo e atractivo para os máis pequenos, en liña co contido da obra. Aínda que aparece o nome escrito debaixo da imaxe correspondente en cor negra e letra maiúscula, as ilustracións adquiren toda a forza comunicativa.

Este libro móstranos como a través de pictogramas poéticos cheos de rimas e repeticións  podemos achegarnos a lectura tanto con cancións como ca lectura do mesmo.

Potencialidades: Lúa está pensado para nenos e nenas moi pequenos, polo tanto é un libro sinxelo e moi atractivo para eles. Cada poema está perfectamente construído e acompañado polas ilustracións sen que teñan a necesidade de ler, aínda que a medida que van medrando quererán saber o que pon en cada imaxe. O libro pode ser contado a través de cancións, polo que é importante xogar coa voz, as pausas e os distintos ritmos para captar a súa atención. A medida que os pequenos aprendan a falar, farémoslles repetir palabras xa que conta con repeticións e cando o saiban contarémolo todos xuntos, propiciando de este xeito un vínculo afectivo entre adulto-infancia.
A partir desta obra podemos traballar diversos factores como poden ser: a memoria, elementos da natureza (lúa e sol), as cores, as texturas, as rimas, a atención, o ritmo, lateralidad (esquerda-dereita), os sentidos (vista-oído), entre outros aspectos. É un xeito creativo de introducir os nenos/as no mundo da lectura, neste caso na poesía, xa que é conveniente que desde pequenos lle amosemos libros de diferentes xéneros pasando un rato cheo de diversión e fantasía.

Se vos pareceu interesante esta proposta,recoméndovos outros títulos da "Colección do berce á lúa" de Kalandraka. Todos eles son moi interesantes para traballar cos nenos e nenas máis pequenos.