El monstruo de colores va al cole.

El monstruo de colores va al cole

Llenas Serra, Anna (2018). El monstruo de colores va al cole. Barcelona: Flamboyant, [44 pp.]. (ISBN: 978-84-9488-324-8).

Descrición do formato: álbum ilustrado de Anna Llenas con cubertas de cartón duro e tamaño de 25x25 cm. Na cuberta principal aparece o protagonista, o monstro de cores coa súa mochila vermella, nervioso ante o enfrontamento á súa nova aventura e unha amiguiña. O fondo de dita portada é de cor branca. O protagonista, como o resto das ilustracións ao longo do conto son de cores variadas e moi vistosas, rechamantes para a vista dos lectores. Realizados posiblemente coa intención de semellar a un debuxo infantil, xa que tanto o monstro de cores, coma unha amiguiña que se mostra na cuberta, teñen trazos de debuxo infantil. Ademais, tamén se pode observar o emprego de elementos que destacan algunhas palabras no título como o cartón pintado de termos como “cole”. Na parte superior aparece tamén o nome da autora. Na contracuberta, tamén de cor branca, aparece un pequeno resumo do contido da obra, acompañado dunha imaxe do monstro de cores no seu baño peiteándose e aseándose. As gardas están cheas de imaxes dos distintos monstros de cores en diversas situacións da vida cotiá. A portada é moi sinxela, ao amosar o título do conto en letra negra acompañado do nome da autora sobre un fondo branco de novo. No interior, as follas son grosas e resistentes. As ilustracións son de carácter figurativo, con contornos en lapis e estilo infantil. A disposición é a ocupar unha páxina e mostra moitas cores e moitos elementos rechamantes para calquera lector/a. En ocasións tamén son empregados elementos como recortes de xornal pintado ou cartóns.

O texto é moi breve e con xogos de tipografía para destacar palabras concretas e dirixir a atención cara a elementos semánticos de interese para o desenvolvemento do contido. A voz narrativa é unha terceira persoa e a linguaxe é moi sinxela e directa, o que favorece a comprensión dos máis pequenos/as.

Dende o punto de vista do contido, a historia está protagonizada polo monstro de cores, o cal se enfronta ao seu primeiro día de escola. Está nervioso posto que non sabe nin o que é. Pero pronto descobre que é un lugar onde lle esperan moitas aventuras e coñecer moitos novos amigos.

Potencialidades: a lectura desta obra trata principalmente o tema do medo ás experiencias novas, en concreto á escola, e da amizade. A medida que pasan as páxinas deste conto, imos descubrindo as rutinas e as vivencias que o noso monstro de cores vai presenciando. Tamén coñeceremos distintas dinámicas da escola e aos seus compañeiros de aula. A lectura da obra permite reflexionar sobre a importancia da escola e a parte positiva que ten a súa asistencia. Outra das temáticas destacadas neste conto son as distintas emocións que experimenta o noso protagonista, estados anímicos polos que pasa durante a súa nova experiencia que o lectorado debe identificar e aprender a xestionar. Tamén salienta no relato a importancia da conversa e a busca de acordos, así como o uso do vocabulario, especialmente no campo dos adxectivos.

Recursos de interese:

Aula de Elena (2018, setembro 25). El monstruo de colores va al cole- videocuento. [Arquivo de vídeo] https://www.youtube.com/watch?v=cP66Fyl3ej0 (consultado o 21/04/2020).

Cuentos para crecer (2017). El monstruo de colores. Actividades y materiales. https://cuentosparacrecer.org/blog/el-monstruo-de-colores-actividades-y-materiales/ (consultado o 21/04/2020).

O gran libro dos medos do rato pequeno

Gravett, Emily (2010). O gran libro dos medos do rato pequeno, adapt. Diego Núñez e Marcelino V. Cageao; trad. Laura Sáez e Mónica Pazos, Pontevedra: Patasdepeixe Editora, [54 pp.]. (ISBN: 978-84-936842-7-3).

Breve descrición do formato e do contido: O libro ilustrado ten unhas dimensións de 24x20 cm e está encadernado en cartoné ou tapa dura. Na súa cuberta aparece o título da obra co nome da súa autora, ademais dun pequeno troquelado na marxe inferior dereita que fai que se poida ver o rato debuxado nas gardas, este detalle simula o bocado que faría un rato. Na contracuberta pódese ver, a modo de tícket, o nome da autora e da editorial, o código de barras, o prezo, ademais do rato pequeno. No lombo aparece o título da obra, así como o logotipo da editorial, que é un peixe. As gardas están debuxadas con motivos alusivos á temática do libro, o medo, en cores brancas e negras, e conteñen información sobre o que se pode atopar dentro da obra. Na portada aparece o título da obra acompañado, de novo, dun debuxo do rato pequeno, que ademais inclúe o nome da autora.

Atendendo aos contidos do libro, o personaxe principal e único é o rato pequeno, que á súa vez é o propio narrador do libro, polo que é un narrador homodiexético, xa que se atopa dentro do libro e fala en primeira persoa. En canto ao texto, este adopta distintas tipografías de letra, é dicir, recórrese a xogos tipográficos nos que se observan diferentes tamaños e disposicións das letras respecto ás ilustracións que acompañan o texto, ademais do uso de maiúsculas e negras en determinados casos. Todo isto permite ao lectorado focalizar a súa atención sobre determinados aspectos de interese.

En canto ás ilustracións, estas reflicten e exemplifican o propio texto e teñen unha disposición a toda páxina, onde os propios debuxos se integran co texto. Estas son de carácter figurativo e están debuxadas a lapis ou carboncillo, ademais teñen cores variadas, aínda que as predominantes son cores escuras e apagadas coma o negro, mesturadas con cores claras coma o branco e o beixe, resaltando ás veces con cores máis intensas, coma vermellos e azuis.

Finalmente, atendendo ás páxinas, estas son irregulares e atópanse cortadas e dobradas, ademais de conter solapas despregabres e un mapa extensible.

Potencialidades educativas: Para traballar este libro ilustrado dentro dunha aula de Educación Infantil, unha das propostas sería exemplificar os distintos tipos de medos, así como coñecer o seu nome e o seu significado. Por outra banda, e despois desa actividade inicial, poderíase deixar que cada un dos nenos e nenas expresaran e explicaran a qué lle teñen medo, todo isto nun ambiente agradable e de calma. Tamén sería de interese que cada neno e nena debuxara un dos seus medos e que o explicara ao resto de compañeiras/os da aula. Cos debuxos e os nomes dos medos de todas as nenas e nenos faremos a nosa illa dos medos, a imitación da que aparece no propio libro, e que nos permitirá buscar outras lecturas nas que haxa illas e aventuras.