Prefiro as de chocolate

JUSTO, Cristina (2019). Prefiro as de chocolate, ilust. María Brenn. A Coruña: Embora edicións, [33 pp.].

Formato e contido da obra: Libro ilustrado con texto de Cristina Justo e ilustracións de María Brenn. A súa encadernación é de tapa branda. Na cuberta preséntanse unhas boliñas de cores sobre un fondo azul e a imaxe de dous rapaces, os cales non distinguimos se son nenas ou nenos, abrindo a boca co propósito de comer algo. En cambio, na contracuberta obsérvanse as boliñas de distintas cores sobre un fondo rosa. As gardas están compostas de forma similar á cuberta, xa que nelas aparecen boliñas, pero neste caso de cor azul sobre fondo azul na primeira e de cor rosa sobre un fondo rosa na última.

As ilustracións ocupan gran parte das páxinas e en ocasións ata sobresaen, dando así unha imaxe de gran tamaño aos personaxes. Por outra banda, as ilustracións son moi reais en canto aos detalles, ás cores e ás formas de cada unha delas, ao velas temos o sensación de movemento en todas as ilustracións. Neste caso a caracterización dos personaxes é sinxela e realista, resaltando os trazos propios deles, con expresións que nos chegan a transmitir as emocións que están a vivir.

O contido xira ao redor de dous irmáns, Icía e Xiao, que nacen o mesmo día. Ao nacer reciben unha chea de agasallos, pero como se os adultos se puxesen de acordo, todos os agasallos de Icía son de cor rosa e os de Xiao son de cor azul. Co paso do tempo os dous irmáns van medrando e a partir de aí empezan a descubrir cales son os seus gustos. A historia conta cun narrador heterodiexético, que sitúa ao lector no comezo da historia ata chegar ao desenlace final. O texto está escrito con elementos da vida cotiá para que así os máis pequenos teñan unha maior comprensión do que está a ocorrer na historia.

Potencialidades educativas: A lectura deste libro nunha aula de educación infantil permite reflexionar e pór en común as distintas ideas que teñen os nenos e nenas sobre os roles de xénero na vida cotiá. Con este libro podemos pór de relevo a importancia da coeducación no ámbito educativo. Por outro lado, podemos aproveitalo para falar e reflexionar tamén sobre o uso das novas tecnoloxías.