RICHARDSON, Justin e PARNELL, Peter (2016). Con Tango
son tres, Ilust. Henry Cole. Pontevedra: Kalandraka Editora, col.Tras os montes,
[32 pp.]. (ISBN: 978-84-8464-985-4).
Formato e contido da obra:
Este libro é un álbum ilustrado con texto de Justin
Richardson e Peter Parnell e ilustración de Henry Cole. A súa encadernación é
de cartón. Na cuberta preséntase aos protagonistas do libro, os pingüíns
Roi, Silo e mais Tango, os cales se mostran felices enrolando os seus pescozos
un ao redor do outro pola chegada do seu fillo Tango. Na contracuberta
podemos observar como é o lugar onde viven os pingüíns e cantos hai. As gardas
deste libro tanto as do comezo como as do fin son de cor azul auga, o que nos
pode levar a relacionalo co estanque onde se mergullan os pingüíns para
bañarse. En canto a portada cabe mencionar que aparecen o título, o nome
dos autores e do ilustrador, así como a editorial, acompañados dunha pequena
imaxe de Roi e Silo contentos e cariñosos entre eles.
As maior parte das ilustracións ocupan a páxina
completa, aínda que nalgunhas preséntanse diferentes escenas na mesma páxina.
Son de carácter realistas e mostran as diferentes emocións que teñen os
protagonistas ao longo da historia. O lugar no que se sitúan é o Zoo de Nova
York.
O contido do libro xira ao redor de Silo e Roi,
dous pingüíns machos que namoran no Zoo de Central Park en Nova York. Eles
comportábanse como calquera parella de pingüíns que había nese zoo, imitaban
todo o que as demais parellas facían incluso preparan un niño para incubar un
ovo, que resulta ser unha pedra, na tentativa de seren pais. Cando o coidador
do zoo se dá conta de que Silo e Roi están a incubar un pedra decide poñerlles
un ovo abandonado no seu niño para que o crien. O resultado é o nacemento dunha
pequena pingüín, á cal o coidador do zoo decide chamar Tango, por facer a comparación co baile tradicional da Arxentina
xa que para bailalo fan falta dúas persoas.
A historia conta en todo o seu transcurso cun narrador
heterodiexético que vai situando ao lector nos diferentes escenarios do libro.
Ten parágrafos curtos e de fácil comprensión para os nenos e nenas a partir de
4 anos que é a quen vai dirixido o libro. Este álbum recibiu varios premios
como o Premio Henry Bergh (Sociedade Americana para a prevención da crueldade
contra os animais) en 2005 e o Premio a Libro Infantil Distinguido (Asociación
Americana de Bibliotecas), o Premio ó Mellor Libro Familiar (Nickelodeon
Magazine), o Premio ao Mellor Libro do ano (Premios Bank College of Education),
todos eles en 2006, e foi finalista do Premio Lambda neste mesmo ano. Foi
traducido á lingua castelá co título de Con Tango son tres, á lingua
catalá co título Amb la Tango són tres, á lingua vasca co título de Tango
iritsita, hiru dira e á lingua portuguesa co título de Três com Tango pero
o título orixinal deste álbum ilustrado é And Tango makes three.
Potencialidades educativas
A lectura deste álbum nunha aula de educación infantil
permite reflexionar sobre os tipos de familias que hai en todo o mundo. Axuda a
ensinarlles aos mais pequenos que non sempre ten que tratarse dunha familia
tradicional, integrada por un pai e unha nai, senón que existen máis tipos de
familias, como é o caso da de Tango.
As referencias ao baile do tango permítenos abordar a
experimentación con diferentes manifestacións artísticos e realizar diferentes
bailes das culturas que existen en todo o mundo para que nenos e nenas os
recoñezan, aprendan e respecten como mostras de identidade dos pobos.
Recursos educativos
Contacontos aula compartida: https://elauladejanire.wordpress.com/2016/03/04/tres-con-tango-cuento-sobre-la-diversidad-familiar/
Ningún comentario:
Publicar un comentario