mércores, 12 de abril de 2017

EL ARENQUE ROJO

Moure, Gonzalo (2012), El arenque rojo, ilust. Alicia Varela, Madrid: Ediciones SM, (a partir dos 5 anos), [24 pp.] (ISBN: 978-84-675-5685-8).


Breve descrición do formato e contido da obra: álbum ilustrado interactivo e sen palabras, de tamaño medio (27,5x27,5 cm.), con pouco volume e cantos redondeados.
A cuberta amosa unha paisaxe dun parque case valeiro. Digo case porque nela podemos atopar unha única personaxe: o protagonista da obra. No medio, ao lado dereito, está o título da obra, e xusto debaixo o nome do autor e da ilustradora.
A contracuberta continúa coa paisaxe da cuberta, e sobre ésta, un breve resumo do contido da obra.
O interior está conformado por ilustracións a toda páxina, carecendo por completo de texto. Estas ilustracións están moi cargadas, pois podemos observar un cúmulo de personaxes e situacións diversas que están a acontecer.
Referíndonos ao contido, podemos dicir que atopámonos ante unha obra que representa a secuencia dunha tarde calquera nun parque calquera. Inicialmente podemos pensar que a obra parece centrarse unicamente na historia do protagonista: el arenque rojo. Pero en realidade hai moito máis do que pensamos.


Potencialidades: tal e como se comenta na contracuberta “estés donde estés, cerca de ti hay historias. Muchas historias. Tantas como personas. Pero ¿las vemos? A veces sí. Y en eso consiste este libro. Al principio, la primera vez solo verás el arenque rojo. Un pretexto para distraerte, un juego, casi una broma. Pero en el fondo, es tu mirada”.
Tal e como acabo de mencionar, a primeira vez que se abre esta obra, centrámonos unicamente en encontrar ao arenque, en saber que lle estará a acontecer. Non obstante, en canto abrimos por segunda, terceira, cuarta… vez o libro, podémonos dar de conta de que ao redor do protagonista están a suceder mil cousas máis: hai moitas persoas, moitas vidas, moitos acontecementos. Deste xeito o autor pretende que sexamos o protagonista: “el arenque eres tú, es cualquier que mire estas páginas”, de tal forma que é como si estivésemos dentro da obra, observando como si fósemos o arenque rojo, todo o que pasa ao noso redor. Así, ímonos fixando en cada unha das personaxes que hai en cada páxina, imaxinando as súas vidas, o que fan e o que non. De feito, cada un de nós fará unha interpretación diferente desas vidas, deixando así voar a nosa imaxinación cada vez que abrimos o libro, representando na nosa mente, unha e outra vez, a vida destes personaxe, pero cada vez dun xeito diferente: podemos inventar unha e mil historias, pois cada vez que pasamos a páxina todas as personaxes continúan no mesmo lugar, aínda que se nos fixamos ben, cambian os seus xestos, fan algo distinto… é nese momento cando nós entramos en escena, interactuando coas personaxes para decidir que lles está a suceder en cada unha das páxinas.
Podemos darnos de conta que esta obra que un gran recurso para fomentar o desenvolvemento da imaxinación e a interactividade, pero tamén para aprender a fixarnos nas pequenas cousas, primeiro na obra que temos diante e logo nos acontecementos do día a día, de todo o que nos rodea.
Finalmente, cabe destacar que esta obra trae consigo un sobre na última páxina cun pequeno libro onde o autor nos facilita sete historias de sete personaxes distintas, representadas a través de ilustracións. O que fai é inventar unha historia para cada unha delas, dándonos así unha pequena pista de cómo crear nós as nosas propias historias, sempre distintas.
Agora só tes que coller esta obra, escoller entre as diferentes e diversas personaxes que hai seguindo o seu recorrido páxina tras páxina, inventando e imaxinando o que lle sucede, a súa vida… Deixa voar a túa imaxinación, creatividade, orixinalidade!

Ningún comentario:

Publicar un comentario