Minilibros para soñar imperdibles 2

VV. AA. (2017) Colección Minilibros para soñar imperdibles 2: Orellas de bolboreta / A cebra Camila / Os ratos da casa / Gato Guille e os monstros / Un agasallo diferente / Xaime e as landras / Os de arriba e os de abaixo. VV. ilust., Pontevedra: Kalandraka, (+ 3 anos) (ISBN: 978-84-8464-307-4).

        

Breve descrición do formato e contido da obra: Trátase dun estoxo de minilibros de 7x7 Cm. que contén os seguinte álbums ilustrados: Orellas de bolboreta, A cebra Camila, Os ratos da casa, Gato Guille e os monstros, Un agasallo diferente, Xaime e as landras e Os de arriba e os de abaixo. Os libros son exactamente iguais que os orixinais pero en miniatura. O estoxo pertence á Colección Minilibros para soñar de Kalandraka. É o número 2 pero a colección conta cunha totalidade de sete estoxos. O estoxo é de cartón e presenta un formato cadrado. Os cantos son rectos e formando puntas. Na parte dianteira vese plasmada a cuberta do álbum ilustrado Orellas de bolboreta. Na parte de atrás pódese ver un listado dos sete libros que se atopan no interior. A caixiña abre polo lateral dereito e deste xeito xa se pode acceder ós minilibros. O estoxo é de cor laranxa.

Potencialidades: A primeira potencialidade que atopo é o diminuto tamaño dos libros. As nenas e nenos están acostumados a ler e ver libros dun gran tamaño que, ás veces, ata lles pode resultar difícil soster. O feito de que estes libros lles collan nas mans fai que os poidan manipular con máis facilidade e sintan que están feitos especialmente para eles. É dicir, adáptanse ós corpos dos nenos. Sae do convencional.

Outra das potencialidades é de tipo económico. Este estoxo custa 10 euros e contén sete obras que por separado custan de 10 a 15 euros cada unha. Por isto, está á man de moitas máis persoas.

Por outra banda, o tamaño pequeno fai que se podan levar dun lado a outro nun peto, nun bolso, nunha mochila... É un bo recurso xa que se poden ler nunha sala de espera de calquera lugar, por exemplo.

Por último, paréceme que o estoxo recolle unha serie de libros nos que se tratan diversos temas moi importantes para traballar con nenas e nenos: A autoestima e a imaxinación (Orellas de bolboreta); a constancia e o medio natural (Xaime e as landras); os animais, as cores e os números (A cebra Camila); o xogo de palabras e as rimas (Os ratos da casa); a superación dos medos e as partes da casa (Gato Guille e os monstros); a utilidade dos obxectos do día a día como xoguetes e a amizade (Un agasallo diferente); e a diversidade (Os de arriba e os de abaixo).