Sopra
neste furadiño...
Cortizas, A. e Lamas, L. (2008). Sopra neste furadiño... Ferrol, España:
Embora. [22 pp.] (ISBN: 978-84-95460-92-9).
Breve descrición do
formato e contido da obra: Trátase dun libro de
tapa dura, cuxa cuberta está representada polo debuxo dunha muller que ten un
burato na boca. Como ben di o libro, “o adulto debe contar esta historia ao
neno ou nena incitándoo a soprar no furado, xa dende a capa. A cada sopro da
crianza van sucedendo distintos acontecementos”. É un álbum ilustrado, xa que
as imaxes forman unha parte importante da obra, e sen elas non se entendería a
historia. A obra pertence á colección “Fardel dos soños”. As portadas primeira
e final son iguais, e mostran un debuxo duns corazóns nas puntas dun cadrado,
cun furado no seu centro. A historia conta o proceso que vai a seguir o neno
que lea o conto cando, ao soprar en todos os furados, descubra o poder que o
seu soprido ocasiona nos distintos animais ou obxectos da natureza e da súa
vida cotiá. A cuberta última mostra como a historia vai a rematar cando o sopro
do neno desemboca nos abrazos da súa nai.
Potencialidades: Esta obra é importante para os nenos no sentido de que con ela aprenden vocabulario novo, divírtense e como consecuencia ven a lectura como algo ameno, e activan as súas habilidades creativas. É moi importante cultivar a imaxinación dos nenos e nenas máis cativos, xa que aí reside o seu éxito. Tamén podemos ver esta obra como unha maneira de facer ver aos nenos a importancia de respectar a vida de todo ser vivo.
Este é un álbum ilustrado poético e interactivo que xa dende a cuberta convida a introducirnos na obra xerando unha certa curiosidade do que pode conter e acontecer ao soprar no furado. Resulta unha obra moi orixinal na que os cativos e cativas poderán descubrir novos e diversos acontecementos co seu alento, unhas veces soprando forte, outras máis amodiño e incluso cos ollos pechados, o que, como dixo a miña compañeira, favorece o desenvolvemento da imaxinación. Asimesmo, os textos rimados resultan un recurso nemotécnico moi efectivo que fomenta a aprendizaxe da lectura e a adquisición dun vocabulario máis rico. É unha obra coa que, teñas a idade que teñas, non te poderás resistir a achegar a túa boca e soprar para saber o que pasará despois, xa que grazas as rimas e as bonitas ilustracións sentimos a intriga de ir máis alá.
ResponderEliminar