La rana de tres ojos

La rana de tres ojos

DE DIOS, Olga (2017). La rana de tres ojos. Zaragoza: Apila Ediciones (ISBN: 978-84-17028-05-3).

Descrición do formato e contido: álbum ilustrado pertencente á colección “Monstro Rosa”, no que se narra unha historia orixinal da autora e ilustradora Olga de Dios. Composto en cartoné, presenta na cuberta o título en maiúsculas e en cor verde. Este sitúase na parte superior. Debaixo do título, aparece con letra cursiva o nome da autora e ilustradora da obra en cor rosa. O logo da editorial aparece no lado inferior dereito. A cuberta é de cor gris claro e escuro, coa protagonista, unha ra de tres ollos saltando no centro da cuberta. Por outra banda, a contracuberta preséntase con cores grises e azuis claros. Nela aparecen os personaxes das obras pertencentes á colección xunto coa protagonista. Arredor dos personaxes aparecen diferentes obxectos contaminantes como botellas de plástico ou pneumáticos. No ceo, que é de cor clara, pódense ver diferentes flores, mentres que no lado esquerdo inferior aparece o símbolo de CC (Creative Commons) e na parte dereita aparece a páxina web da autora. No interior, as gardas presentan un fondo de cor gris clara, alusivo á temática. As únicas ilustracións que aparecen son as curvas en cor verde que deixa a protagonista ao saltar. Este rastro vai desde a páxina esquerda a dereita, podendo observar nesta última as patas da ra na parte superior. Como en todos os libros desta autora, aparece unha dedicatoria na parte inferior da páxina dereita, mediante a cal lle dedica o conto a todas as persoas que colaboran no coidado do planeta. A páxina de dereitos aparece entre as gardas e a portada. É de cor gris escura co texto en branco e recolle información relevante da obra e das normas Creative Commons. A portada é de cor gris clara e está composta por un debuxo da protagonista subida a unha torre de pneumáticos. No centro do debuxo aparece o título en cor verde e debaixo deste o nome da autora en cor branca e cursiva. Finalmente, debaixo do nome da autora amósase o logo da editorial.

O libro componse de 44 páxinas de 22x25 cm. Respecto ás ilustracións e o texto, están impresos en offset CMYK. As ilustracións levan todo o protagonismo ocupando ambas páxinas, mentres o texto simplemente ocupa os laterais, tanto na parte superior coma inferior. Os debuxos móstranse en fondos de cor gris, mentres que o final da obra se amosa cun fondo en cor azul clara, ilustrando así a mellora do planeta mediante o seu coidado. Así mesmo, os personaxes e o lixo aparecen con cores rechamantes, que resaltan os debuxos sobre os diferentes fondos. En canto ao texto, empréganse dúas cores diferentes: a cor negra para os fondos claros e a cor branca nos fondos escuros. O nome da protagonista, Rana de tres ojos, destácase en letra grosa, mentres que palabras relevantes como “cosas” ou “fábrica de cosas nuevas” faise a través do uso de maiúsculas. O texto é breve e de fácil comprensión en toda a obra.

En canto ao argumento, a historia comeza coa presentación da protagonista e o seu crecemento. A continuación, un narrador en terceira persoa explica que a protagonista tíñase que bañar cun traxe de raias porque a auga estaba moi sucia. Aprendendo a saltar, chegou á terra e comprobou que o ceo sempre tiña unha nube de cor escura e que todo estaba cheo de cousas novas que ninguén quería. A súa avoa explicoulle que antes vivía moita xente alí, pero que marcharon debido á gran cantidade de lixo. A ra, investigando de onde viñan tantas cousas, encontrouse cunha fábrica que as facía e pediulle que parara, pero esta non a escoitou. Contoulle o ocorrido aos seus amigos e xuntos levaron todas as cousas ao carón da fábrica ata cubrila. A fábrica, ao ver tantas cousas deixou de producir e comezou a reciclar. Grazas a isto, a zona onde vive a protagonista recuperou a vexetación e a xente que antes vivía alí, ademais a ra puido quitar o traxe de raias para bañarse.

Pontencialidades: a lectura desta obra permítenos abordar a temática da contaminación, polo que favorece o respecto e o coidado do medio ambiente e a reciclaxe. Á súa vez, poténciase a idea de que non se necesitan moitos obxectos materiais para a nosa vida e ofrécese unha visión positiva da natureza a través das ilustracións. Por último, de maneira visual, ofrécense dúas percepcións: o resultado cando non coidamos o medio ambiente e, pola contra, o resultado cando si o facemos.

Recursos: Sharing Learning (2018). El baile del cambio (canción de Erik Sjöholm e Tamara González, baseada no conto). Recuperado de https://www.youtube.com/watch?v=Kuhyjx-M6O4 (consultado o 11/05/2020).