Vestida co arco da vella

                                 

Amado, A. C., & Trobec, Š. (2008). Vestida co arco da vella. Ferrol, A Coruña: Embora Edicións, 28 pp. (ISBN: 978-84-95460-93-6).

Descrición do formato e contido: álbum ilustrado de formato cadrado, con tapa dura e 28 páxinas. Orientado para nenos e nenas de máis 3 anos. Na cuberta observamos sobre un fondo de cor branca a cara dunha nena pintada en cor negra e situada á dereita, mentres que á esquerda aparece unha serie de teas de distintas cores, organizadas verticalmente, na orde das cores do arco da vella. Ademais, entre estas dúas imaxes podemos ver o título da obra, Vestida co arco da vella, e na parte superior os nomes do autor e da ilustradora centrados, con letra cursiva en negro.

Pola contra, na contracuberta o fondo é de cor vermella, seguindo a última cor que se describe no conto. As gardas presentan distintas cores que representan o arco da vella, elemento que aparece case ao final do conto. As ilustracións destacan pola súa orixinalidade, por utilizar cores moi variadas e rechamantes e utilizar diferentes técnicas, como a acuarela, a colaxe... Ademais, é curioso que case todas as páxinas se caracterizan pola cor que se trata no texto e nelas as ilustracións están feitas construíndo un código visual que completa o texto.

                 

Trátase dun texto poético de carácter narrativo que recrea a historia dunha nena que vai probando distintas pezas de roupa de distintas cores e que acaba por vestirse con tantas cores como ten o coñecido arco da vella. Este texto resalta pola utilización de recursos como a anáfora, o paralelismo ou a comparación, por utilizar unha narración en segunda persoa que se dirixe ao lector/a e por xogar visualmente con varios tamaños e cores de letra. Deste modo, a temática central da obra son as cores, aínda que tamén aparecen temas secundarios como as prendas de roupa e os adxectivos.

Potencialidades: a lectura deste poemario permite que nenos e nenas aprendan as cores de modo lúdico, as diferentes prendas de roupa e diversos adxectivos. Ademais, as rimas e comparacións que contén este álbum favorecen a memorización e estimulan a concienciación fonolóxica. Este álbum pode ser moi útil para que os nenos e as nenas se introduzan na lectura en lingua galega a medida que van aprendendo e aumentando o seu vocabulario.

Recursos de interese: Blanco, R. (2015). Vestida co arco da vella [vídeo]. Recuperado de: https://www.youtube.com/watch?v=0KutXgGdev8 (consultado o 28/02/2018).