Yo

Waechter, Philip (2018), Yo, trad. Eduardo Martínez, Madrid: Lóguez Ediciones, [64 pp.]. ( ISBN: 978-84-8980-487-6).

Descrición do formato e contido: álbum ilustrado de Philip Waechter e traducido por Eduardo Martínez. É de cartoné, forma cadrada e lese de forma vertical. As cubertas son de cor amarela moi rechamante e de tapa dura. Na cuberta podemos observar o nome do autor, o título en vermello, o nome da editorial e un debuxo dun oso pardo cruzado de brazos. Na contracuberta atopamos un resumo, o ISBN co seu código de barras e unha imaxe do oso saltando por riba do código de barras. No lombo, o cal é de cor vermella, aparece de novo o título e o nome do autor. As gardas son totalmente de cor vermella. Na portada ademais dos elementos da cuberta aparece tamén a imaxe do oso sentado. As imaxes ocupan toda a páxina e veñen acompañadas por breves frases.

O protagonista desta historia é un oso pardo, o cal vai comentando cales son as súas virtudes e os seus gustos, facendo alusión a canto se quere a si mesmo. Porén, ao final da historia o oso di que ás veces tamén se sente só e pequeno e que para remedialo busca a compañía da xente que o quere.

Potencialidades: A lectura desta obra é adecuada para nenas e nenos a partir dos 2 ou 3 anos. Entre as temáticas que se poden abordar figura a autoestima e o autoconcepto, como se ven eles a si mesmos e as calidades que cren que teñen, xa que esta é a temática central do libro. Ademais tamén se podería traballar aspectos como saber compartir, ser xenerosos/as ou a importancia que ten poder contar co cariño das persoas que temos ao noso redor.

Recursos:

GLM Español Kinder (2020). Lectura Yo de Philip Waechter. Recuperado de: https://youtu.be/p68OwQ4KtfU (consultado o 11/05/2020).