Las gafas de sentir.

PÉREZ-SAUQUILLO, Vanesa y SÁNCHEZ, Sara (2017). Las gafas de sentir. Barcelona: Beascoa, (ISBN:978-84-488-4786-9).

Descrición do formato e contido: este álbum ilustrado escrito por Vanesa Pérez-Sauquillo e con ilustracións de Sara Sánchez conta con 14 páxinas cunha dimensión de 22 x 22 cm. Na cuberta predominan dúas cores, azul e branco, aínda que aparecen moitas máis pero en menor cantidade. Comezando pola parte superior atopamos o nome da colección á que pertence o libro (“Grandes pasitos”) e xusto debaixo o título acompañado dos nomes da escritora e a ilustradora. Na parte inferior aparece Marquitos, o rapaz protagonista que se protexe dunha choiva de cores co seu paraugas negro. Por último, na esquina inferior dereita aparece o logo da editorial Beascoa. A contracuberta é de cor verde e amarela e nela aparece de novo o protagonista con diferentes expresións faciais: alegría, enfado, medo e calma. Aparecen dous pequenos textos que invitan a coñecer a historia e os demais contos desta colección.

Xa no interior, tanto as gardas iniciais coma as finais son de cor azul clara e contan con numerosas siluetas de gafas brancas; a páxina de dereitos achega información relevante como o ISBN ou o número do depósito legal, así como unha pequena dedicatoria da escritora e outra da ilustradora; a portada é igual cá cuberta, pero con fondo branco.

No interior do libro podemos observar como cada ilustración se representa nunha páxina diferente co seu respectivo texto. Só nos casos nos que o protagonista leva as súas gafas se dispón a ilustración a dobre páxina. O texto é de cor negra e cunha tipoloxía semellante á letra escrita a man. Cada frase acompaña a unha ilustración e todas elas riman, o que aporta musicalidade e ritmo á historia. Nas últimas dúas páxinas aparecen dúas actividades para realizar cos nenos e nenas. A primeira consiste en facer as diferentes caras que vemos representadas e que están relacionadas con diferentes emocións, a segunda consiste en pegar unha foto co cativo ou cativa e cubrir o seu nome.

Desde o punto de vista do argumento, este álbum ilustrado achégalle ao lectorado a historia dun cativo chamado Marquitos. Este rapaz ten unhas gafas que cando as pon pode sentir diferentes emocións e fala das situacións nas que aparecen. O texto conta cun narrador en primeira persoa, xa que é o protagonista quen conta o sucedido.

Potencialidades: a través da lectura deste álbum as crianzas poden coñecer as diferentes emocións e algunhas situacións nas que se poden dar, así como conseguir xestionar aquelas que son negativas. As rimas do texto axúdannos a desenvolver a conciencia fonolóxica dos máis pequenos e a manter a atención do público, ademais de facilitar a memorización da historia.