Os magos das formas

Fariña, Anxo (2004). Os magos das formas. Vigo: Promocións Culturais

Galegas, 28 pp. (ISBN: 84-96403-23-8)

Descrición do formato e contido: álbum ilustrado de Anxo Fariña que presenta

unha cuberta de vivas tonalidades amarela, azul e violeta sobre un fondo tamén

amarelo escuro. Dáselle unha cor e unha forma diferente a cada un dos tres magos

protagonistas. O título atópase na parte superior central en cor branca. A

contracuberta amosa unha ilustración dos tres magos facendo maxia dende unha

torre con tres ventás con formas rectangular, triangular e circular, unha para cada

mago. Tamén aparece unha breve sinopse da historia con tipografía de tamaño

medio, a mesma que se utiliza en toda a obra. Nas gardas represéntase un fondo

azul vistoso cunhas liñas en formas de ondas, mentres que na portada aparece de

novo o título no centro rodeado por pequenas ilustracións das escenas que

aparecen por todas as páxinas do libro.

A historia narra a confrontación entre os tres magos das formas por saber cal é a

forma máis importante no mundo. Así deciden facer unha proba eliminando cada

unha das formas durante un día distinto para que os propios veciños puideran votar

a mellor. Cada día cambia a vida para a aldea porque sen as formas faltan moitos

obxectos cotiáns e incluso letras, así que ao final os veciños acaban moi

desgustados co que fan os magos. Eles atopan a unha nena que lles di que a súa

forma favorita é a estrela, polo que os magos se decatan de que todas as formas

son importantes por igual e deciden convidar aos veciños a unha festa polas

molestias.

Potencialidades: a lectura deste álbum ilustrado permite achegarse á temática da

fantasía e da maxia mediante as figuras dos magos. Ademais, para nenos e nenas

das primeiras idades tamén os aproxima ás formas xeométricas, pois poden

identificar as formas básicas da contorna e clasificalas. Durante cada día en que

desaparece unha forma na historia noméanse obxectos cotiáns, alimentos e letras,

así que a obra resulta unha boa opción para trasladar estes exemplos á realidade

dos pequenos/as.