¿Dónde está Spot?

Hill, Eric (2015). ¿Dónde está Spot?, ilust. Eric Hill, trad. Luis Font, Barcelona: Plataforma, col. Libros para jugar, (de 0 a 4 anos), [28 pp.] (ISBN: 978-84-16429-40-0).

Breve descrición do formato e contido: É un libro de formato pequeno, case cadrado (22 x 21´5), cunha encadernación de tapa dura e esquinas redondeadas, perfecto para que os nenos/as o poidan manexar dunha forma doada e sen mancarse. A cuberta é branca e nela destaca o título en letras negras e grandes, acompañado da imaxe dun can mirando dentro dun baúl; na contracuberta volve aparecer a mesma personaxe, pero desta vez acompañado do protagonista, o cachorriño Spot, ademais dunha breve explicación do conto.

O volume presenta unha solapa en cada folla impar, por iso ao principio do libro, na portada, aparece unha folla en cor azul cunha alfombra e debaixo dela... o oco para poñer a quen pertence o libro. Na portada volve aparecer o título, o autor e a editorial nun fondo branco e na contracuberta todos os datos destes.

            O conto é o primeiro dunha colección onde se contan as aventuras de Spot. Este primeiro relato trata de buscar ao pequeno Spot, xa que á hora de cear desapareceu e a súa nai búscao por toda a casa: detrás da porta, no reloxo, debaixo da cama,... en cada sitio que mira ábrese unha solapa e aparece en cada lugar un animal dicindo que alí non está Spot ata chegar ao final onde... o cachorriño  por fin aparece.

Potencialidades: Aínda que ¿Dónde está Spot? pareza un conto sinxelo, permítenos traballar moitos aspectos como os lugares (dentro- fóra / encima-debaixo), os sons dos distintos animais que aparecen ao longo da historia, permitindo que os nenos/as contesten coas correspondentes onomatopeas, e a dicir que NON, así como a visualizar a súa escritura.

É un conto que aos nenos/as lles gusta moito debido a que en cada folla poden levantar unha solapa e pescudar se Spot está alí debaixo, de forma que participan e interactúan con el. Podemos dicir que é unha forma de xogar ás agachadas ao tempo que se le un libro. Neste agocharse chamamos a atención dos máis cativos porque debaixo ou detrás de cada obxecto aparece calquera tipo de animal, dende osos ata pingüinos, fomentando así a súa curiosidade polo que aparecerá, e sobre todo, por saber onde estará Spot.