O entroido

Fernandez, Jacobo (2009), O Entroido, Vigo: Galaxia, col. Pimpín por aquí non vin (de 0 a 6 anos), [14 pp.] (ISBN: 978-84-9865-151-5).

Breve descrición do formato e contido da obra: álbum ilustrado divulgativo enumerativo en galego que se caracteriza polo seu formato pequeno en libro-acordeón, de tapas duras, despregábel nunha longa saba, con dous buracos para ser colgado, no que a ilustración é a protagonista. Está estruturado en dúas caras. Por una delas, unha ilustración única, continua, sen texto, na que se reflicte unha situación típica do “Entroido”. Pola outra cara, diferente vocabulario acompañado de representacións gráficas, referente ao tema do libro, o Entroido. Ademais, conta cunha paxina de preguntas sinxelas que se lle irán facendo aos nenos para que realicen unha lectura visual da ilustración da cara posterior do libro.

Potencialidades: como a propia cuberta nos amosa, é un libro que achega os cativos a unha das tradicións propias de Galicia como é o Entroido. Este libro permite aos máis pequenos xogar con el e coa historia que se conta por medio da ilustración, para iso terán que tentar solucionar as preguntas que se lles propoñen no propio texto, como por exemplo “por que vai vestida así de rara a xente?”, á vez que aprenden as primeiras palabras relacionadas co tema do Entroido (“as orellas”, “o peliqueiro”,...) Ademais, presentáselles a un fermoso paxaro que se chama Pimpín e que se atopa agachado na ilustración, ao que terán que esforzarse por atopar.