Son un bebé

Rabe, Tish (2008), Son un bebé, ilust. Ana Larrañaga, trad. Antía Pereira, Vigo: Promocións Culturais Galegas, col. Os libros de Tatá, (de 0 a 3 anos), [16 pp.] (ISBN: 978-84-8341-248-0).

Breve descrición do formato e contido da obra: volume de pequeno formato, de cantos redondeados e as páxinas divididas horizontalmente en tres partes separadas. Presenta un breve texto nas páxinas pares que mantén a mesma estrutura en todas elas, cunha frase de presentación (“son unha meniña” ou “son un meniño”, dependendo do sexo do protagonista), outra frase fai referencia á cor que predomina en cada páxina (“Coas pezas amarelas gústame xogar”, “Coas pezas verdes gústame xogar”...) e por último outra frase na que se alude aos xoguetes que acompañan o/a protagonista e as cores destes. Cada unha destas páxinas correspóndense coa ilustración que aparece nas páxinas impares.

Potencialidades. Como se indica na propia cuberta, é “un conto para mesturar e combinar. Ducias de combinacións de cores”. Por iso, o feito de que cada páxina estea divida en tres partes independentes que se poden combinar libremente permite que se lea a historia cada vez dunha forma diferente e que os pequenos vaian decidindo as combinacións, amais de ir aprendendo a diferenciar cores, xoguetes, roupa e mesmo as partes do corpo, dependendo da pericia do adulto que lle narre cada unha das historias que xorden das múltiples combinacións posibles. Por outra parte, a obra propicia unha visión multicultural, a través dos protagonistas, que pertencen a diferentes razas.