O monstro de cores

Llenas, Anna (2015), O monstro de cores, trad. Okodia, Barcelona: Editorial Flamboyant, (de 3 a 6 anos), [48 pp.] (ISBN: 978-84-941578-8-2).

            

Descrición do formato e contido: a presente obra é un álbum ilustrado narrativo que versa sobre unha historia orixinal. O volume preséntase nun formato cadrado de tamaño medio e cuxas cubertas son grosas e ríxidas, servindo a ilustración da cuberta como un adianto ao que se trata no seu interior. Neste caso, o álbum posúe gardas nas que se imprimen unha serie de círculos de cores que poderemos observar nas ilustracións de toda a obra. Os debuxos presentes ao longo da historia lémbrannos aos que fan os nenos en idade infantil, con trazos imprecisos, cores moi variadas e un recheo dos debuxos que tamén imita a pintura da infancia. Debemos facer mención a que, nalgunhas páxinas, eses debuxos incluso semellan estar en tres dimensións pola diversidade de materiais que aparentemente se utilizou para crealos.

Hai unha correspondencia entre o texto, escrito en galego,  e as imaxes, que van avanzando simultaneamente. Con respecto ao contido, a historia achégalle ao lector como un monstro se atopa confuso porque non sabe que sente; entón, unha nena axúdao a identificar e separar as súas emocións en diferentes botes de cristal. Ao longo deste álbum identifícanse as distintas emocións con cores, menciónase unha calidade das mesmas e relaciónanse con elementos naturais e accións da vida cotiá. Por exemplo, dise da tristeza que sempre bota de menos algunha cousa, que é suave como o mar e doce como os días de chuvia, mencionando que cando un está triste adoita apetecerlle estar só e permanecer impasible.

Potencialidades: é evidente que o obxectivo principal deste conto é axudar a nenas e nenos a identificar as súas propias emocións, é dicir, achegalos a un mellor coñecemento de si mesmos e ao autocontrol. Ademais, somerxerémonos no coñecemento das cores e, a raíz do volume, poderemos achegar os nosos alumnos e alumnas ás artes plásticas, permitindo que desenvolvan a súa creatividade e favorecendo ademais a lectoescritura.

Por outra banda, dentro das ilustracións, concretamente nos círculos de cores, hai fragmentos de textos dos que podemos obter palabras chave sobre as que construír novos coñecementos. Por exemplo, na páxina referida á alegría podemos ler o nome de Charles Dickens. En base a isto resulta oportuno convidar os pequenos a descubrir quen é este personaxe favorecendo, deste xeito, un achegamento ás novas tecnoloxías como fonte para recadar información e potenciar a aprendizaxe significativa.