A casa da mosca chosca

MEJUTO, Eva (2002). A casa da mosca chosca,ilust. SergioMora. Pontevedra: Kalandraka, [40pp.]. (ISBN: 978-84-8464-155-1).

Breve descrición do formato e contido:este álbum ilustrado é unha adaptación dun conto popular ruso recuperado por AleksandrAfanásiev. A adaptación é da autora Eva Mejuto e as ilustracións de Sergio Mora. O álbum é encadernado en cartoné cunhas dimensións de 22 x 22 cm e contén 40 páxinas. Na cuberta móstrase a imaxe dunha mosca voando e o título do álbum. As gardas presentan un fondo similar á cuberta e contracuberta, cuns trazos negros, que recrean os pelos que aparecen no corpo da protagonista. Se abrimos o libro, na portada aparece unha cafeteira botando fume, no que aparece unha vez máis o título do conto. Na contracuberta atopamos a casa da mosca, na que observamos unhas liñas descontinuas, que cando abrimos o libro por completo podemos observar que representan a traxectoria seguida no aire pola mosca. O álbum emprega cores explosivas e animais extravagantes. Os personaxes caracterízanse por ter unha personalidade propia, polo humor e expresividade. O conto consta de rimas repetitivas, recursos propios da tradición oral. Dende o punto de vista do contido, este álbum ilustrado narra a historia dunha mosca chosca que cansou de revoar sen rumbo e construíu unha casa para ter un lugar onde recibir diferentes animais do bosque. A mosca elaborou un pastel de amoras e grazas ao cheiro foron aparecendo, do máis pequeno ao máis grande, sete habitantes do bosque.

Potencialidades educativas:a lectura deste álbum ilustrado permite traballar o xogo de números e tamaños. Tamén se pode traballar a integración sociale a diversidade, xa que no conto se convida a todos os animais sen ningunha condición. Por outra banda, é un conto que invita ao xogo fonético grazas ás rimas e repeticións.

Recursos educativos:

Audioconto: https://www.youtube.com/watch?v=CfzEpFwj1_E (consultado o 21/04/2020).