Barbosa el pirata y las islas de las plumas

González, Jorge (2013). Barbosa, el pirata y las islas de las plumas, ilust. do autor, Barcelona: Bang Ediciones, col. Mamut. [40 pp.]. (ISBN 13: 978-84-15051-55-8).

Descrición do formato e do contido: álbum ilustrado do autor Jorge González. Na cuberta aparecen debuxados nun fondo amarelo os personaxes: un elefante, un crocodilo, un mosquito e un pirata. Na contracuberta, temos catro ilustracións máis do pirata e outro protagonista da historia, unha gaivota. Nas gardas iniciais temos o mar debuxado e nel o barco do pirata que leva a bordo o elefante, o crocodilo e o pirata. Na portada vemos o elefante durmindo e como se achega o mosquito ao barco e entra nel.

Os debuxos do álbum preséntanse coma un cómic, con diferentes viñetas en cada páxina, que van contando a historia sen necesidade de texto. A historia desenvólvese na temática mariñeira e pirata, predominando as cores azuis, amarelas e negras. A historia trata sobre o pirata Barbosa que está tranquilamente durmindo abordo do seu barco cando o esperta un mosquito. Barbosa e os seus tripulantes, un elefante e un crocodilo, comezan unha nova aventura. A través dun prismático, Barbosa mira unha gaivota que lle rouba o seu característico sombreiro de pirata. Os catro amigos, elefante, crocodilo, mosquito e Barbosa van na procura del. Chegan a unha illa onde hai moitas gaivotas diferentes e non saben onde está a que lle roubou o sombreiro. Cando por fin a atopan, Barbosa acha unha incrible sorpresa que lle fará cambiar de opinión e ter unha nova amizade.

Potencialidades: con este relato podemos traballar diferentes temáticas como son a amizade, a diversidade, compartir, a empatía etc. Que o álbum sexa soamente ilustrado, non teña texto, dá cabida á imaxinación, a que nenos e nenas poidan cada un facer a súa interpretación da historia, pór diferentes nomes aos protagonistas etc. Outra potencialidade educativa podería ser crear os diálogos e asociar esta obra con outras das moitas que coñecen sobre o tópico dos piratas na literatura infantil.

Recursos: na rede cóntase cun vídeo no que se conta a historia: Recuperado de https://www.youtube.com/watch?v=rahpUAjiytU (consultado o 13/04/2020).