Os ratos da casa

González, X. M (2015). Os ratos da casa. Pontevedra: Kalandraka, [36 pp.]. (ISBN: 978-84-8464-467-5).

Descrición do formato e contido da obra: álbum ilustrado de tapa dura con dimensión de 200 mm x 200 mm. Escrito polo autor Xosé María González Barreiro, tamén coñecido como Oli, e ilustrado por Natalia Colombo. Na cuberta podemos observar a imaxe dun coche azul no que van dentro catro ratos. Este coche está metido dentro dunha figura que parece ser unha casa. Ademais, o chan e o ceo están representados de cor vermella e azul, respectivamente. O título do conto e mais o nome do autor e a ilustradora, encóntranse na parte superior da imaxe, na metade desta, con letras maiúsculas brancas grandes. Na contracuberta podemos ver o que parece un pequeno bosque, no que hai unhas cantas árbores de distintos tamaños e cores e nun deles vemos pousado un paxaro. Ademais, ao lonxe hai unha montaña de cor vermella, parte do ceo de cor azul, o chan onde están plantadas as árbores de cor amarela e verde e unha parte cha de cor azul. Na parte esquerda, xunto ao pequeno paxaro, está plasmada a frase “libros para soñar” en letra minúscula de cor negro.

Este conto relata a historia dunha familia de ratos, a cal sae dunha montaña e a través dos camiños chega a unha casa chea de buracos na que poden agocharse. Os ratos ao chegar a noite chegan á cociña, que está chea de comida. Pero a comida está en pratos, que ao caeren ao chan alarman ao gato. O gato, querendo chamar a atención da muller da casa, comeza a miañar. A muller, asustada, dille ao seu marido que pensa que no andar inferior, na cociña, andan os ladróns. O marido, non dándolle importancia, non se levanta, e a muller vai avisar ao seu fillo. Este pensou durante toda a noite ata que chegou a mañá, cando o galo cantou. Cando este cantou, a familia de ratos asustouse e marchou.

Este álbum presenta imaxes a toda a páxina. A ilustradora fai moito uso dos colores primarios e secundarios. Gran parte das imaxes están coloreadas de amarelo, vermello e azul, e hai moitos detalles en cores verdes, laranxas, marróns... Ademais están feitas con ceras e lapis de cores. Moitas destas ilustracións representan espazos domésticos, como poden ser a cociña e a habitación, detalle que fai que o lector poida encontrarse con situacións e espazos cotiáns. O texto, de cor negra, e cun tipo de letra fácil de ler para os mais pequenos, é na súa totalidade rimado e vai encadeando as personaxes e os elementos a medida que vai transcorrendo a historia.

Potencialidades educativas: este conto está orientado para que sexa lido polos máis pequenos. Non é un libro no que poidamos destacar unha aprendizaxe en valores, pero con el, podemos traballar de maneira eficiente a lectoescritura e a discriminación visual. É un álbum ilustrado con cores moi vivas, o que chamará a atención dos nosos nenos. Ademais, ao longo da historia, podemos distinguir distintos personaxes, distintos lugares, obxectos, animais... Poderemos desenvolver a alfabetización visual e outras competencias a través de preguntas como: cantos animais ves nesta imaxe? Que obxectos de cociña son estes? Na habitación, onde se encontra a cama? Con isto, ademais de contarlles a historia, conseguiremos que os/as nenos/as estean tamén atentos ás ilustracións.

Recursos educativos:

O autor conta o conto: http://www.kalandraka.tv/es/busqueda.php?busqueda=ratones+de+casa (consultado o 20/4/20)

Nenas de 3º de primaria contan o conto: https://www.youtube.com/watch?v=sY5Mf0MZmJM (consultado o 20/4/20)