¿A que sabe a Lúa?

Grejniec, Michael (2009). A que sabe a lúa?, ilust. do autor, trad. Carmen Barreiro, Pontevedra: Kalandraka, [36 pp.]. (ISBN: 978-84-8464-564-1).

Descrición do formato e contido: A qué sabe a Lúa é un álbum ilustrado composto por 36 páxinas e é recomendado para nenas e nenos maiores de 3 anos. É un libro de formato rectangular (19,5x29 cm), de gran tamaño e tapa dura. Na cuberta observamos unha imaxe dunha lúa chea e na parte inferior un dos animais que aparecen no libro, a xirafa, mentres que na parte superior está o título, co nome do autor e na inferior, o da editorial. Na contracuberta aparece a lúa en fase minguante. Na primeira garda do libro introdúcenos á obra ensinándonos unha gran lúa chea cuns olliños mirando por debaixo dela; a última remata a obra cun peixe falando. No interior, as páxinas son grosas e as ilustracións son orixinais, de gran tamaño, mentres que o texto está sobre un fondo branco, alternando á esquerda e á dereita cunha páxina ilustrada sobre fondo azul escuro, onde se ven os animais na cima da montaña tentando chegar á lúa. Isto muda nas últimas páxinas, nas que a ilustración ocupa a dobre páxina. As ilustracións representan a estrutura acumulativa progresiva do propio texto, posto que vemos como se suceden as imaxes dos animais subidos un enriba dos outros, de xeito paralelo á propia narración. 

A historia conta como unha tartaruga que todas as noites observan a lúa decide tentar alcanzala para poder descubrir a que sabe. Como ela non é capaz pide axuda a outros animais, como o elefante, a xirafa, a cebra, o león, o raposo, o mono e o rato, quen foi quen de lle arrincar un anaquiño á lúa e compartilo cos seus amigos para saber a que sabía a lúa. A cada un sóubolle a aquilo que máis lle gustaba. Observando todo o esforzo do grupo estaba un peixe, quen se pregunta polo sentido de tanto traballo, cando hai unha lúa moito máis preto dentro da auga.

Potencialidades: atopámonos ante unha obra que trata diferentes temas de interese (animais, amizade ou cooperatividade). A través desta obra podemos traballar unha gran cantidade de valores e conceptos, como por exemplo, o sabor dos alimentos e o concepto de doce ou salgado; os conceptos de arriba e abaixo ou tamén se poden traballar os animais da selva e a súa alimentación. Como valores podemos destacar a importancia do traballo en equipo, a cooperación e a amizade; a importancia de esforzarse para conseguir os obxectivos tanto de forma individual como coa axuda dos demais e, por último, a importancia de respectar as opinións dos demais, xa que cada un pode ter o seu punto de vista e a súa opinión dun tema en concreto, como lle pasa aos animais co sabor da lúa ou a percepción que ten o peixe pola perspectiva da súa posición. Ademais neste álbum sae unha serie de animais dos que se ofrecen características, polo que a estrutura acumulativa axuda aos máis pequenos/as a desenvolver a conciencia narrativa.

Recursos:

Kamishibai: Atal Puche (2017). A que sabe la luna:

https://www.youtube.com/watch?v=MRnyJA-STQ (consultado o 21/4/20)