Augusta e os seus medos

Fernández Trelles, Sabela (2015). Augusta e os seus medos. Ilust. Alicia Suárez, Vigo: Edicións Xerais de Galicia, [32 pp.]. (ISBN: 978-84-9914-783-3).

Descrición do formato e o contido: este é un álbum ilustrado escrito por Sabela Fernández Trelles e ilustrado por Alicia Suárez, vai dirixido a nenos/as a partir dos 4 anos. A historia está protagonizada por unha nena que quere cumprir moitos soños, mais non o consegue polos medos que ten. Tras pedirlles axuda aos seus pais, dáse conta de que a única forma de superar os medos é enfrontarse a eles.

Este volume de capa dura presenta na cuberta unha imaxe diferente á da contracuberta. Na primeira aparece Augusta voando cun paraugas mentres chove e ao fondo aparecen máis personaxes do álbum facendo o mesmo que a nena. Porén, na contracuberta soamente aparecen uns corazóns en forma de flores. En ambas empréganse cores claras e vistosas, tanto nas imaxes coma nas letras do título, para chamar a atención do lector. Nas gardas iniciais aparece unha imaxe de Augusta coas mans na cara representando o medo que ten. Isto contraponse co que aparece nas gardas finais, nas que podemos atopar a imaxe da nena sorrindo, emoción que demostra que superou os seus medos. Na portada empréganse letras grandes e vistosas, ademais aparecen uns debuxos de barcos de papel de diferentes cores. Antes da portada, aparece unha páxina cos títulos de crédito e a dedicatoria da autora.

O texto presenta un narrador omnisciente en terceira persoa que vai contando como vive o seu día a día cos seus medos. A estrutura é lineal e nela vese o que fai Augusta, coa axuda dos seus pais, para ir superando os diferentes medos. Aparecen algunhas frases con letras de maior tamaño, que pretenden captar a atención do lector e aportar intensidade á historia. O texto está escrito con letras grandes que facilitan a lectura. Emprega frases curtas cun vocabulario acorde coa idade á que vai dirixido. O contido do texto está centrado nos medos e como se pode facer para superalos. As imaxes recrean o que di o texto, facilitando a súa comprensión. As imaxes ocupan a páxina completa. No texto faise referencia aos animais cando a nena ten que superar o medo que ten ao xardín, neste momento aparecen ilustradas diferentes bolboretas. Os materiais empregados son acuarelas, que destacan no fondo branco.

Potencialidades: A lectura deste álbum ilustrado permite reflexionar sobre o que nos dá medo na vida e valorar as razóns que nos producen esa sensación. Identificar os medos é o primeiro paso para poder superalos. A través de historias como a de Augusta, as nenas e nenos poden sentirse identificados e comprender a necesidade de superar os seus temores. Ademais, coñecer as estratexias que lle serviron á protagonista, estimulan actitudes positivas, entre elas o ser capaces de pedir axuda aos pais ou mestres/as para conseguir o noso propósito.

Recursos educativos:

• CEIP Arquitecto Casas Novoa. Experiencia educativa nunha aula de Educación Infantil cun contacontos de Augusta e os seus medos en https://www.edu.xunta.gal/centros/ceipcasasnovoa/node/267 (consultado 25/03/2020).