Familias

Oh! Mami Blue (2018). Familias. Barcelona: Somos Libros. [48 pp.]. (ISBN: 978-84-948081-5-9).

Descrición do formato e do contido: álbum ilustrado de tapa dura, cun formato de 18 x 26,5 cm e formado por 48 páxinas. Na cuberta aparece unha cama ben feita, escenario principal ao longo das páxinas e que representa a familia e o fogar. Na contracuberta aparece a mesma cama, pero esta vez desfeita. O único texto que aparece na contracuberta é unha frase onde se resume a intención de toda a obra: “Existen tantas familias como formas de amar. Una familia no necesita ser explicada, sólo vivida. Y tu familia, ¿Cómo es?”. Nas gardas segue aparecendo a cama debuxada dun xeito máis sinxelo. A portada conta co título da obra, os nomes das autoras, o nome da ilustradora e o da editorial. Ao longo da páxinas preséntanselle ao lectorado 16 viñetas, nas páxinas dereitas, onde se amosan diferentes tipos de familias, cuxo escenario principal é a cama. Estas ilustracións están acompañadas de textos rimados nas páxinas pares, os cales teñen un título que introduce que tipo de familia imos coñecer. As ilustracións, ao igual que todo o libro, están feitas con cores pasteis e as personaxes represéntanse núas durmindo, dun xeito moi andróxino, para axudar a non asumir o xénero dos personaxes tan só polos seus xenitais.

Dende o punto de vista do contido, a obra xira arredor da normalización da diversidade familiar e as autoras presentan as familias como un espazo de amor e coidado, que xira arredor da cama, escenario que representa o fogar. Como o propio título di, o importante é ver familias sen reparar en quen as conforma. Os textos rimados están feito con certo sentido do humor e tenrura que engancha ao lectorado, dende o máis pequeno aos maiores. Os tipos de familias representadas son variadas, como por exemplo: un neno con dous pais, unha nai solteira, unha moza solteira que vive soa, un rapaz con pais divorciados, familia multirracial, etc. A forma de representar todas estas familias envolven o libro dun aire de paz e amor, propiciando a empatía do lectorado con todas as familias.

Potencialidades: Este álbum está indicado para nenos e nenas a partir de 2 anos, é un libro co que se podería traballar na casa e na escola para que dende pequenos os nenos e nenas comprendan que existen moitos tipos de familias e que todas son unidades de afecto respectables. Tamén permite reflexionar sobre valores como o respecto e a tolerancia, o cal é necesario dende idades temperás, para que no futuro sexan cidadáns que se desenvolven e promoven a liberdade e diversidade. Na aula existen moitos tipos de familias diferentes, polo que cada neno e nena viven a realidade deses contextos con naturalidade e iso debe reflectirse tamén na comunidade educativa, na que debe estar presente a diversidade familiar, cultural, sexual etc. Por todo iso consideramos este libro unha lectura moi acaída.