Van Genechten, Guido (2013). Lolo, un conejo diferente, Madrid:
Editorial Ediciones SM, [28 pp.]. (ISBN: 978-84-675-6128-9).
Descrición do formato e o contido da obra: Álbum ilustrado
de tapa dura do autor Guido Van Genechten. A cuberta amosa unha imaxe na que
aparece o protagonista da historia, Lolo, un coello branco cunha orella erguida
e outra caída. Leva unha vestimenta amarela e unha cenoria na man. Na
contracuberta obsérvase unha imaxe dunha paisaxe na que aparece unha horta con
moitas cenorias sobre un ceo azul. Sobre o ceo soleado hai un resumo do contido
da historia. Nas gardas aparecen grandes cenorias. Na portada e páxina de
créditos vemos moitos coellos diferentes con expresión alegre.
Dende o punto
de vista do contido, a obra trata varias temáticas entre elas, a diversidade, a
diferenza, o acoso e a amizade. Lolo, un
conejo diferente é un conto no que o protagonista é un coello que ten unha
orella caída. Os demais coellos sempre se rin del e fanlle comentarios que a
Lolo non lle gustan. Lolo ante as burlas dos demais intenta colocar a súa
orella e poñela recta, a pesar diso, os demais séguense rindo del. Ata que un
día decide ir ao doutor. Este dille que todas as persoas teñen as orellas
diferentes e que as súas son iguais de boas que as dos demais. Despois desta
conversa, Lolo séntese moito mellor e proponlle un xogo aos seus amigos. Con
este conto, todos/as podemos observar que moitas veces rímonos do físico ou da
personalidade doutra persoa e podemos chegar a facerlle dano. Tamén é unha
demostración de que todos somos moi diferentes tanto física como persoalmente.
O texto presenta un narrador heterodiexético, con frases curtas e escritas en
letra redonda, o que favorece a aproximación á lectura dos máis pequenos.
As imaxes teñen unha disposición de dobre páxina
durante toda a historia e presentan aos personaxes humanizados e de marcado
estilo infantil. As emocións reflíctense nos seus rostros, pero mentres todos
rin, Lolo aparece como un personaxe angustiado e triste polas burlas das que é
obxecto. Todas as escenas son sinxelas e incitan ao lector a continuar lendo.
Empréganse moitas cores de diferentes tons, con personaxes ataviados con roupas
coloristas e remarcados en cor negra, o que permite que destaquen sobre os
fondos, sempre en espazos abertos e ao aire libre.
Potencialidades educativas: Despois da lectura deste álbum pódese
reflexionar co alumnado sobre valores como a diferenza, as características
individuais e únicas que nos definen. Con este conto demóstrase que todos somos diferentes pero
que todos somos iguais de importantes. Xa sexamos gordos, xa fracos, altos ou
baixos, merecemos respecto por parte dos demais e a súa aceptación. É por iso
necesario traballar nas aulas temas como o respecto e a amizade, así como o
acoso, que se representa coas burlas e os comentarios que lle fan a Lolo os
demais coellos. O respecto vese claramente na persoa do doutor, aconsellando e
animando ao protagonista. E a amizade obsérvase no final do conto cando todos
os amigos/as gozan xogando xuntos/as, sen importarlles as diferenzas entre os
uns e os outros.
Lectura do conto por parte dunha persoa
aulta, en https://www.youtube.com/watch?v=MeYQNp1qqjc (consultado o
29 de marzo de 2020).
Documento en pdf con varias actividades
coa temática do conto para traballar nas aulas de Educación Infantil, en http://ecat.server.grupo-sm.com/ecat_Documentos/ES147020_011164.pdf (consultado o
29 de marzo de 2020).
Ningún comentario:
Publicar un comentario