A cebra Camila

Núñez, M. (2004): A Cebra Camila. Ilust. Villán, O. Pontevedra: Kalandraka [32 pp.]. (ISBN: 978-84-8464-126-1)

Breve descrición do formato e do contido: álbum ilustrado de cartoné, cunhas medidas de 22x22cm. Na cuberta aparece o título da obra, en cor negra, nun fondo redondo branco, sobre un fondo marrón. Tamén aparece Camila, a protagonista, que leva postos os seus cueiros morados cos seus tirantes vermellos. Está sobre o céspede verde, e predomina ao seu redor o ceo azul. Ao lado de Camila están os nomes dos autores da obra, en cor branca e negra. Na contracuberta, tamén de cor marrón, aparece o caracol que nun momento determinado, axudou á nosa protagonista. Está colocado sobre unha bola verde, semellando o céspede. No interior, as ilustracións son de dobre páxina, e predomina sempre o mesmo escenario, o ceo marrón e o céspede verde.

Este conto é unha obra narrada, acumulativa e rimada, na que Camila vestía sempre os seus cueiros morados e os seus tirantes vermellos, ata que se lle quedaron pequenos, e ela xa non os quería pór, pero a súa nai non a deixaba saír sen eles. Un día, desobedeceu e saíu a rúa eles, polo que o vento lle levou as raias do seu corpo. Entón comezou a chorar e foi pedindo axuda a distintos animais para recuperar as súas raias. Cando chegou á casa, a súa nai regaloulle a última fita e confesoulle que xa era maior, polo que non tería que volver levar os tirantes e os cueiros.

Potencialidades educativas: coa lectura deste álbum ilustrado podemos traballar coas nenas e nenos de Educación Infantil a importancia de axudarse os uns aos outros, sobre todo cando unha persoa ten un problema e precisa da nosa axuda. Tamén é importante reflexionar sobre o proceso de maduración, as distintas etapas nas que configuran a vida e os procesos de aprendizaxe que a eles van asociados.

Recursos de interese:

Lectura animada do libro: https://www.youtube.com/watch?v=lXW5ej2EdXA