Laia

FERNÁNDEZ, B (2018). Laia. Ilustr. Leandro Lamas. Betanzos: Baia Fernández de la Torre, 36 pp. (ISBN: 978-84-09-02013-3).

Descrición do formato e o contido: álbum ilustrado cunha cuberta dura e resistente, encadernación en cartoné. A súa forma é cadrada cunhas dimensión de 23x23. A súa cuberta amosa unha imaxe moi bonita, que na parte inferior asómase a metade da cara dunha nena pero con prolongacións asociadas a diferentes elementos da natureza: o final do seu pelo aparenta o azul do río; a parte superior, o cume dunha montaña da que semellan asomar dúas árbores cheas de paxaros. Sobre as árbores aparece o título en cor azul. Por outra parte, na última folla aparecen os datos correspondente á ficha bibliográfica do libro. Por último, na contracuberta, na parte superior amosa uns paxaros enriba dunha póla e na parte inferior aparecen unha ondas azuis. Entre estas dúas ilustracións aparecen dúas opinións sobre o libro.

As páxinas desta obra están cheas de cor grazas ás ilustracións realizadas con lapis e acuarela. Abundan paisaxes naturais e animais que chaman a atención dos nenos/as. A tipografía utilizada é sinxela, de cor negra e dun tamaño pequeno. Este álbum ilustrado contén gran cantidade de texto pero a linguaxe empregada é moi sinxela. Ademais mantén unha secuencia repetitiva cos distintos animais cos que se vai encontrando ao longo da historia.

Dende o punto de vista do contido: Laia é unha nena moi especial, leda e á cal lle encanta andar polo bosque e cantar cos paxaros. Ao longo das páxinas amósase como Laia se encontra con distintos paxaros atraídos polos seus cabelos en distintas tonalidades que van marchando e a deixan preocupada pensado que os aburre ou non gustan dela. Ao final da historia Laia reencóntrase cos tres paxaros, estes falan dunha mesma rapaza pero con distintas cores de cabelo, mais cando Laia aparece decátanse de que se trata da mesma rapaza pola súa ledicia e cantar. Laia cunha mensaxe final intenta transmitir que a pesar das dúbidas acerca dos pensamentos dos paxaros cara  a ela, foi capaz de ser feliz e facer moitas cousas emocionantes.

Potencialidades: esta lectura transmítenos como tema principal a aceptación propia. Laia aborda a necesidade de coñecerse e valorarse a un mesmo á marxe do que os demais poidan xulgar. Amosa tamén a importancia de valorar elementos e virtudes e non cuestións vinculadas á aparencia, fomentando así a interiorización de valores adecuados e importantes na infancia. Este álbum ilustrado aventúranos ao camiño da experiencia e a aprendizaxe como paso necesario para crecer e ser nós mesmos.

  Recursos:

Nicolás, R (2018). Laia de Baia Fernández e Leandro Lamas [Mensaxe dun blog] Caderno de crítica. Recuperado de https://cadernodacritica.wordpress.com/2018/08/24/laia-de-baia-fernandez-de-la-torre-e-leandro-lamas/